Візіт мітрапаліта Філарэта ў Польшчу

Ада ЧАЧУГА

18 лістапада на граніцы ў Баброўніках мітрапаліта Філарэта сустрэлі мітрапаліт Сава і епіскап Беластоцкі і Гданьскі Іакаў.

Першай мэтай падарожжа мітрапаліта Філарэта быў Гарадок. Тут, у царкве Нараджэння Прасвятой Багародзіцы адбылася яго сустрэча з народам. Прывітаў яго настаяцель Мікалай Астапчук. Са словам да сабраных вернікаў звярнуўся мітрапаліт Філарэт. Пасля абеду і кароткага адпачынку госць з суправаджаючымі накіраваліся ў Варшаву.

19 лістапада ў Варшаве адбыліся дзве важныя падзеі. А гадзіне дзесятай уладыка Філарэт разам з мітрапалітам Савам адслужылі ўрачыстую Святую Літургію ў саборы святой Марыі Магдаліны.

У гэты ж дзень адбылася ўрачыстая вячэра, арганізаваная ў гонар мітрапаліта Філарэта Казімірам Мараўскім, старшынёю Хрысціянска-грамадскай уніі, які з’яўляецца дарадчыкам прэзідэнта РП.

Вельмі істотны быў дзень 20 лістапада. Перш за ўсё гэта быў візіт у прэзідэнта Рэчы Паспалітай Аляксандра Кваснеўскага. Напэўна, было аб чым пагаварыць. Спраў, няраз балючых, назбіралася ў нас тут нямала. Вядома, прысутнічаў і мітрапаліт Сава.

У гэты ж дзень мітрапаліт Філарэт правёў сустрэчу ў Польскай экуменічнай радзе. Пасля быў абед у пасольстве Рэспублікі Беларусь у Варшаве.

21 лістапада, у дзень святога Міхала, адбылася Літургія ў Міхайлаўскай царкве ў Бельску-Падляшскім. (Пра візіт у Бельску чытайце на стар. 3.)

У гэты ж дзень а гадзіне семнаццатай у Беластоку, у Саборы святога Мікалая адбыўся акафіст у гонар святога мучаніка-дзіцяткі Гаўрыіла. Мітрапаліт Філарэт разам з уладыкам Савам шмат зрабілі дзеля таго, каб мошчы святога мучаніка Гаўрыіла вярнуліся на радзіму. Яны будуць знаходзіцца ў царкве ў Зверках, калі ўжо закончыцца яе будова.

Людзей сабралася мноства. Не ўсе змясціліся ў Мікалаеўскім саборы. Уладыка Іакаў прывітаў дарагога госця. Было вельмі ўрачыста.

Гэта быў ужо не першы візіт у Польшчу мітрапаліта Мінскага і Слуцкага Філарэта, партыяршага экзарха ўсяе Беларусі, сказаў нам айцец Мікалай Падолец, сакратар канцылярыі епіскапа Беластоцкага і Гданьскага Іакава. Ён быў ужо на Беласточчыне ў 1985 годзе, калі асвячаў у Драгічыне прастол. Тады ж наведаў Святую Гару Грабарку. Гэта вялікая падзея для Праваслаўнай царквы ў Польшчы. Кожны такі прыезд мае глыбокі сэнс. Мітрапаліт Філарэт пазнаёміўся з сённяшняй сітуацыяй, праблемамі праваслаўных і беларусаў у Польшчы. Мы разам з вернікамі вельмі ўдзячныя яму за гэты візіт.